Ég hjálpa fólki að takast á við streitu og
öðlast færni til að halda jafnvægi til framtíðar.
Um Báru
Ég vinn með einstaklingum og hópum að því að draga úr áhrifum streitu og byggja upp varanlega færni til að takast á við álag í daglegu lífi.
Ég legg áherslu á þrjá meginþætti:
-
Streitulosun – að róa streitukerfið og koma líkamanum í betra jafnvægi
-
Fræðslu og ráðgjöf – að auka skilning á streitu og áhrifum hennar
-
Persónulega úrvinnslu – að vinna úr þeim aðstæðum sem valda streitu í lífi hvers og eins
Markmiðið er að hjálpa þér að ná jafnvægi á ný og byggja upp færni sem nýtist til framtíðar.
.jpg)
Ég hef víðtæka reynslu af því að vinna með fólki að persónulegum og starfstengdum verkefnum sem stuðla að uppbyggingu og vexti. Ég hef starfað á breiðum vettvangi sem stjórnandi, ráðgjafi og markþjálfi og vinn einnig með einstaklingum sem takast á við streitu, missi og erfiðar lífsaðstæður.
Ég er menntuð í viðskiptum með áherslu á mannauðsstjórnun og er vottaður streituráðgjafi frá Forebyg Stress í Danmörku, þar sem ég lærði undir handleiðslu Bjarne Toftegård, eins fremsta streitusérfræðings Dana. Ég hef einnig lokið ICF-vottuðu ACC markþjálfanámi og námi í heilsumarkþjálfun og unnið með aðferðarfræði markþjálfunar síðan 2015, auk þess að hafa lagt stund á nám í sálgæslu og sorgarráðgjöf.
Ég hef ástríðu fyrir því að styðja fólk til vaxtar og að sjá það eflast og finna til sín.
Þegar ég féll fyrir streitu
Ég hef sjálf reynslu af því að falla illa fyrir streitu og vinna mig út úr miklu streituástandi. Ég þekki því af eigin raun hvernig hún getur haft áhrif á sjálfstraust, orku og lífsgæði. Á þeim tíma var ég í annasömu stjórnunarstarfi, fyrirtækið að ganga í gegnum miklar breytingar og ég vann langa vinnudaga. Ég fann fyrir líkamlegum einkennum, þar á meðal stöðugum þrýstingi í brjóstinu og öndunarerfiðleikum, en taldi mig samt ráða vel við aðstæðurnar. Þegar ég loks leitaði til læknis var ljóst að líkaminn hafði brugðist sterkt við álaginu og ég var "tekin úr umferð" um tíma. Sú reynsla var mér mikið áfall en um leið vakning.
Áfallið og lærdómurinn
Þetta var mér mikið áfall. Ég elskaði starfið mitt, vann hjá frábæru fyrirtæki og taldi mig ekki vera svona illa stadda. Smátt og smátt áttaði ég mig þó á því að ég hafði til langs tíma „fórnað“ sjálfri mér í mikilli vinnugleði og ekki hugað nægilega að eigin heilsu eða jafnvægi.
Heilsutengd streita
Auk vinnutengdrar streitu hef ég einnig upplifað verulegt álag tengt heilsu, bæði persónulega og innan fjölskyldunnar. Ég hef sjálf greinst með brjóstakrabbamein og höfuðæxli og farið í viðeigandi meðferðir vegna þess. Einnig á ég dreng sem fæddur er með skarð í vör og klofinn góm og þekki því vel það álag sem fylgir veikindum og aðgerðum barna.
Þessi reynsla hefur dýpkað skilning minn á því hvernig streita og áföll hafa áhrif á fólk og hversu mikilvægt er að fá stuðning og verkfæri til að takast á við slíkar aðstæður.
Líf í jafnvægi
Persónuleg reynsla mín af streitu og álagi er því orðin töluverð. Það var þó ekki fyrr en ég fór að kynna mér streitustjórnun og leiðir til að takast á við álag að ég áttaði mig fyrir alvöru á því hve mikil og skaðleg áhrif streita getur haft á líf fólks.
Þegar ég öðlaðist skilning á streitunni og því sem raunverulega gerist lífefnafræðilega í líkamanum varð ég algerlega hugfangin af efninu. Þá skildi ég einnig að streita þarf ekki að vera nauðsynlegur fylgifiskur í lífinu og að hún á alls ekki að vera norm.
Það er svo ótalmargt sem við getum gert til að vinna með og fyrirbyggja streitu. Þegar við öðlumst skilning á henni og fáum verkfæri til að takast á við hana verður mun auðveldara að halda lífi okkar í jafnvægi.
Menntun og réttindi
Ég er með fjölbreyttan bakgrunn sem nýtist í vinnu minni með fólki sem glímir við streitu, álag og krefjandi lífsaðstæður.
-
MBA með áherslu á mannauðsstjórnun – Háskólinn í Reykjavík
-
Streituráðgjafi – Forebyg Stress, Danmörku
-
Sálgæsla – diplómanám á meistarastigi, Endurmenntun HÍ
-
Sorgarráðgjöf – Edu Therapy, Kanada
-
BA í auglýsinga- og markaðsfræði – San Jose State University, Kaliforníu
-
Sjúkraliði – Verkmenntaskóli Akureyrar
-
Markþjálfi – Evolvia
-
Heilsumarkþjálfi – Institute for Integrative Nutrition, New York
-
Reykleysisráðgjafi – Kræftens Bekæmpelse, Danmörku
Ég hef jafnframt sótt fjölda námskeiða og ráðstefna, bæði hér á landi og erlendis, á sviði stjórnunar, eflingar mannauðs, álags í starfsumhverfi, streitu og streitutengdra málefna.
Frekari upplýsingar um menntun mína og starfsferil má nálgast á LinkedIn
Trúnaður
Sem streituráðgjafi vinn ég í fullum trúnaði og legg ríka áherslu á að skapa öruggt rými þar sem þú getur talað opinskátt um það sem skiptir þig máli. Sem markþjálfi starfa ég einnig eftir siðareglum alþjóða samtaka markþjálfa (ICF, International Coaching Federation) og er bundin trúnaði um allt sem fram fer í samtölum okkar.
Það sem við ræðum fer því ekki lengra, hvorki til vinnuveitenda né annarra, jafnvel þótt þeir greiði fyrir samtölin, nema skv. þinni ósk eða með skýru samþykki þínu.
Ef þú vilt fá stuðning í að takast á við streitu eða krefjandi aðstæður er velkomið að hafa samband eða bóka tíma.
Svanberg Halldórsson
“Þvílík lukka að hafa fengið tækifæri í gegnum vinnuna til þess að þiggja streituráðgjöf frá Báru. Hún hjálpaði mér mjög mikið. Persónuleg og góð nálgun.
Ég mæli svo sannarlega með streitu-námskeiðinu hjá Báru.
Takk fyrir mig!"
Ingibjörg Guðlaug Jónsdóttir, mannauðsstjóri
"Streituráðgjöfin hjá Báru hjálpaði mér að ná fókus og setja mér markmið til framtíðar. Ég fékk fullt af verkfærum til að nota í daglegu lífi til að draga úr streitu.
Bára er ótrúlega hvetjandi, skemmtileg og frábær markþjálfi og stjórnendaráðgjafi.
Ég mæli 100% með Báru!"
Ríkey Eiríksdóttir
"Bára er ótrúleg. Hún veitti mér þau bjargráð sem ég þurfti í minni vegferð gegn streitu. Ég fékk fullt af verkfærum, verkefnum og ráðum sem hjálpuðu mér að draga úr streitu og komast í jafnvægi á ný.
Bára er persónuleg, hlý, fagleg og kann sitt fag.
Mæli eindregið með streitustjórnunnni hjá Báru"